Mumtaz Lala | دا ګلاب وګوره اوس اوس پرې چا اوبه شيندلي هغه چې لوند کړي کله مخ په اوبو داسې به وي

1 year ago
1

لکه کړسا د تازه ګرمو نينو داسې به وي
هر څوك چې خيژي په تنکيو توبو داسې به وي
ـ
په ډګډګي دغه يو کس ته زر په ځير وګورئ
حسن چې سور شي د هوا په اوږو داسې به وي
ـ
دا ګلاب وګوره اوس اوس پرې چا اوبه شيندلي
هغه چې لوند کړي کله مخ په اوبو داسې به وي
ـ
ما په تڼاکو ياده کړې زما لويه خدايه
څوك چې الله الله کوي په تسبو داسې به وي!
ـ
په مونږ را ګډو دښمنانو ته چې ګورم وايم
چې کله ګډ شي تور لېوان په رمو داسې به وي
ـ
زه کله کله چې دې خپل ضدي زړګي ته ګورم
وايم چې ګير د پښتنو په لانجو داسې به وي
ـ
ممتازه ځانته آئينه کې ګورم چرت وهمه
چې څوك حيرانه شي يو دم په سلګو داسې به وي

Loading comments...