THREE BROTHERS OF POVERTY

THREE BROTHERS OF POVERTY

«КЕДЕЙЛІК ҮШ АҒАЙЫНДЫ» ДЕГЕН СӨЗДІҢ МӘНІСІ

Дерт жіберген Құдірет болмашы бір нәрседен дауасын да өзі жібереді. Бірақ дауа жоқ екі түрлі ауру бар. Бірі «Өзің білме, білгеннің тілін алма» деген қарғысқа ұшыраған ақымақтардың ақымақтығына дауа жоқ. Бірі- жалқаулыққа, еріншектікке дауа жоқ. Ақымақтықтан жалқаулық көп жаман. Жалқаулықтың себебінен жас адам кәрі кісі сықылды әрекеттен бос қалмақ. Бұрыңғылар «Кедейлік үш ағайынды болады» деген. Үлкені – кежірлік, ортаншысы-еріншектік, кенжесі-ұйқы... Бұл үшеуі – бірі –желкеңнен тартып, бірі құйрығыңды жерге жабыстырып, бірі қисайта құлатып жібермей жатқан соң, қолың қайда жетсін? Өзіңнен өзің кері қарай кетіп қор боласың.
Тіл алғыш, елгезек болып үйрен – кежірліктен құтыласың. Тіпті дәнеме қылмасаң да жаяу аяңдап, олай – бұлай жүріп үйрен-жалқаулықтан құтыласың. Дүние ақиреттің бірі болмаса, бірінің уайымын ойлап «қалай қыламын, қайтып есебін табамын?» деп ойға түс - ұйқышылдықтан құтыласың. Бұл үшеуінен құтылсаң қолың әр нәрсеге жетеді.

Мәшһүр Жүсіп Көпеев
#esenmediakz #esenmedia #есенмедиакз #есенмедиа