Urdu Poetry Gazal Mai Asy Mor Par Apni Kahani Chor Aya Hon By Nadeem Bhabha

میں ایسے موڑ پر اپنی کہانی چھوڑ آیا ہوں
کسی کی آنکھ میں پانی ہی پانی چھوڑ آیا ہوں

ابھی تو اس سے ملنے کا بہانہ اور کرنا ہے
ابھی تو اس کے کمرے میں نشانی چھوڑ آیا ہوں

بس اتنا سوچ کر ہی مجھ کو اپنے پاس تم رکھ لو
تمہارے واسطے میں حکمرانی چھوڑ آیا ہوں

اسی خاطر مرے چاروں طرف پھیلا ہے سناٹا
کہیں میں اپنے لفظوں کے معانی چھوڑ آیا ہوں

ندیمؔ اس گردش افلاک کو میں چاک سمجھا تو
وہاں پر زندگی اپنی بنانی چھوڑ آیا ہوں

ندیم بھابھہ